Nus gidein bugen Vus
Il beinstar da nos pazients stat el center da nossas activitads el ChiroCentrumChur. Vus vuleis esser aschi spert sco pusseivel puspei en pei ed activs. Sche Vus haveis mals ella zona dalla spina dorsala ni dall’ulteriura giugadira sco la spatla, il calun, il schanugl ni il pei, essan nus la dretga adressa per Vus. Nus analisein Vos moviments, la posiziun da Vies tgierp e la giugadira che fa mal ed anflein aschia la raschun da Vossa maldispostadad. Cun tecnicas chiropraticas migeivlas sligein nus a moda sperta e nundolorusa bloccadas dalla giugadira. Exercezis sempels gidan Vus a sustener activamein la reconvalescenza ed ad evitar el futur ils problems grazia a giugadira stabila.
Tgei ei la chiropratica insumma?
La chiropratica moderna ei ina disciplina autonoma dalla medischina scientifica. Ella possibilitescha en bia cass da tractar in pazient cun success senza medicaments ed intervenziuns chirurgicas. La chiropratica ei efficienta, segira e favoreivla. Quei success apprezieschan era ils miedis da casa, ils specialists ed ils spitals. Il ChiroCentrumChur collaborescha secapescha stretgamein cun quellas reits da specialists.
Cura fa ei senn dad ir tier il chiropraticher?
Haveis Vus mal il dies pervia d’ina fallida repartiziun dalla peisa, pervia d’in accident ni d’ina fallida posiziun dil tgierp? Lu recumandein nus a Vus da far in termin tier nus. Nus diagnostichein e tractein disturbis funcziunals dalla spina dorsala e digl ulteriur apparat motoric. Las structuras pertuccadas ein la giugadira, la musculatura, las terscholas ed ils ligioms.
Tgei fa il chiropraticher exactamein?
Mals vegnan caschunai da fallidas repartiziuns dalla peisa sur in temps pli liung ni d’influenzas traumaticas sin nies tgierp. Quei irritescha il sistem dalla gnarva ed activescha a moda exagerada las musclas ed ils recepturs dalla giugadira. Cun il temps sa ei dar aschia bloccadas dalla giugadira. Il chiropraticher localisescha la giugadira pertuccada e deblocchescha quella a moda precisa cun in fin impuls. Ils recepturs pertuccai vegnan discargai ed ils mals mitigai. Il specialist applichescha adina la tecnica chiropratica la pli adattada che slucca la musculatura ed augmenta la movibladad dalla giugadira. En certs cass san reflexs neurofisiologics era influenzar a moda favoreivla certas funcziuns organicas.
Tgi duess seschar tractar dil chiropraticher?
Da principi sa mintga persuna, digl affon pign tochen alla persuna attempada, s’adressar al chiropraticher en cass da mal il dies ni la giugadira. Il specialist sclarescha en mintga cass premurusamein, sch’in tractament ei necessaris e tgei fuorma ch’ei la pli adattada per gidar il pazient a moda individuala.
Persunas attempadas cun mal il dies e la giugadira sa in tractament chiropratic gidar a mitigar las dolurs. Per eleger la moda da tractar adattada risguarda il chiropraticher specialmein la posiziun adina pli uiarscha dalla spina dorsala, la massa d’ossa reducida, la forza dallas musclas tschessonta, la steriadad adina pli gronda dalla giugadira ed ulteriurs sintoms dil pazient.
Affons pigns cun «culiez uiersch» ni cun colicas duront ils emprems treis meins sa la chiropratica savens gidar a moda sperta e nuncumplicada.
Tier affons san ins diagnosticar a moda sempla e prematura musters evidents ella posiziun dil tgierp, el moviment ed el cumportament. Cun paucas mesiras terapeuticas ed il tractament correct eis ei pusseivel d’evitar consequenzas a liunga vesta.
Duront la gravidonza vegn igl apparat motoric dalla mumma futura strapazaus specialmein. Bloccadas dalla giugadira, gronds mals e restricziuns dil moviment ein pli frequentas. In accumpignament ed in tractament chiropratic sustegnan la mumma vegnenta ed il pop aunc buca naschius. Els ein ina part raschuneivla d’ina assistenza da gravidonza e d’ina preparaziun dalla naschientscha interprofessiunala.
Tgi paga il tractament?
Ils chiropratichers ein tenor la lescha persunas medicinalas independentas. L’assicuranza fundamentala obligatoria dalla cassa da malsauns surpren perquei ils cuosts. Tractaments ch’ein necessaris suenter in accident vegnan indemnisai dall’assicuranza d’accidents. Quei vala medemamein per l’AI e l’assicuranza militara.
Cun il model d’assicuranza da miedis da casa ni il model HMO sto il miedi da casa ni l’assicuranza assignar il pazient.
